「做得馬評家，就係負責教導馬迷乜嘢係賽馬，更要為馬迷講句公道說話。」董驃（1934-2006）
驃叔叔深得民心，係因為佢仗義執言，站在馬迷一方講話。有前輩話畀利世民知，其實驃叔嘅貼士唔係好準，甚至乎好多時接近山埃。不過呢啲往績，完全冇影響到驃叔響廣大馬迷嘅崇高形象。
財經評論員嘅工作，同馬評人一樣。股民其實都明白財經評論員冇可能百分之一百正確，正如馬評人亦無可能場場中。馬評人如果可以百發百中，大家都會懷疑︰「造馬咩！咁準？」
點止貼士咁簡單？
所以響財經評論界，有啲打滾咗幾十年嘅前輩，佢哋德高望重，並唔係因為貼親都中。老實講，響財經界如果可以一年貼中十隻八隻，一早就做咗畢菲特，成為世界第二首富啦，又邊使咁辛苦做分析員賺微薄嘅稿費？
既然馬評人同財經評論員唔可以次次中，咁佢哋嘅價值又係乜呢？
馬圈同財經界一樣，有非常嚴重嘅資訊不對稱。馬房知道嘅消息，當然比馬迷多；同樣道理，投資銀行知道嘅消息，亦都比股民多。呢個現象本來無可厚非，不過正如驃叔叔話齋︰「馬房贏馬贏錢係天公地道，輸馬贏錢就天理不容。」所以作為一個財經評論員，首要任務就係踢爆啲犧牲小股民利益嘅不平事，就好似鄰居孫兄話齋︰「用隻金手指篤、篤、篤。」
當然，作為一個財經評論員，最基本工作就係教導投資者乜嘢係市場。市場其實就係人面對風險嘅不同辦法。利世民不止一次講過，小心明白風險為何物，學懂對應風險手段，就會發現風險不但唔可怕，而且更加係機會處處。財經評論員，應該做嘅其實又點止畀貼士咁簡單？
利世民