恒指高低波幅86點，埋單跌22點，淡友冇點贏，好友冇點輸。中移動（941）明日派成績表，長實（001）與和黃（013）下周四派成績表，幾盤數出嚟之前，炒家態度審慎。成績表就快出嚟嘅公司，股價如果先軟，反為係好事，一旦盤數好過預期少少，股價即有較佳變化．
滙控C輪9607：滙控（005）上周一派成績表前，股價係132.30元，昨日132.80元。一張咁靚嘅成績表，只值0.50元？滙控下周三除息2.42元，除息前或有好息股民買多啲貨，有利股價。C輪冇息收，除息理論上不利C輪，不過C輪輪價已先行反映，所以3月份夠鐘嘅滙控C輪，隻隻𠵱家都係負咗溢價先，計埋股息因素，實情係有輕微溢價。
滙控短期睇升，短炒C輪，向5月及以後到期嘅埋手比較着數。正路貨係9607，最旺嘅滙控C輪就係佢，有213球易手，相等於街貨兩倍，買賣唔怕冇對手。隻輪5月尾夠鐘，輪價35仙，負溢價0.3%，槓桿率37.9倍（有效22.9倍），引伸波幅11.3%。昨跌8%，啱晒趁平上車。
港交所C輪2268：外國證交所股票搶到飛起，炒港交所C輪，可以諗2268。隻輪8月初夠鐘，輪價54仙，溢價2%，槓桿率7.4倍（有效6.1倍），引伸波幅23.7%。
章盛