四十五條關注組搞嘅公民黨，吹就吹咗好耐，又搞到中央騰晒雞，成日透過中間人，問佢哋究竟搞成點。不過，唔使等太耐，中間人就可以少啲壓力，據知公民黨暫定喺本星期日搞個成立大典，宣布組黨成功，又會公開所有職位人選，一切水落石出，中間人都唔使頻頻刮料。
八方一早話咗，民主女神Audrey會做黨魁，中大政治與行政學系系主任關信基就做主席，呢個安排至今無變。副主席反而變數好多喎，由於兩個副主席中，有一個一定要係立法會議員，所以來來去去都係嗰幾個名，最新跑出嘅大熱係新黨員張超雄，真係有啲出人意表。至於秘書長，盛傳會由城大教授鄭宇碩做，反而其他三大狀，包括Margaret、Ronny同Alan，就未有着落，唔通另有要務在身？
Audrey噚日講到組黨時，就話唔覺公民黨會同其他民主派造成競爭，又話唔想同民主派塘水滾塘魚，互相攻擊。佢咁諗當然好啱，可惜佢唔太明樹大招風呢個道理，佢哋名氣響噹噹，就算唔撬，人哋都可能自己黐埋嚟，最終可能都有拗撬，呢樣真係要小心啲。
爆料熱線：29290000、27860099
報料傳真：26239278
報料電郵：[email protected]