香港大學噚日舉行第一百七十三屆學位頒授典禮，前港督衞奕信亦都獲頒名譽文學博士。以前曾經係衞奕信嘅手下嘅煲呔，當然今時唔同往日，噚日就心情好靚咁坐喺頒獎台上，幫前老細衞奕信行「扑頭」禮。八方見佢笑得咁開心，口痕問吓佢見到舊朋友心情點？煲呔就笑到見牙唔見眼咁話：「感覺良好！」
至於闊別香港多年嘅衞奕信，喺廁所門前撞到八方，八方就問佢覺得曾蔭權做特首做成點？佢就盛讚煲呔係一個好人，仲話今次回港主要係見吓舊朋友，前日就同以前嘅貼身護衞行吓以佢個名命名嘅衞奕信徑。至於訪問，已經唔再係政治人嘅前港督，梗係話免問啦！
除衞奕信獲榮譽文學博士外，港大另頒發名譽法學博士畀加拿大國會參議員利德蕙、名譽科學博士畀港大牙醫學院創辦人戴義安及行會非官守成員梁智鴻、名譽社會科學博士畀永亨銀行董事李國賢同國務院發展研究中心研究員吳敬璉。
爆料熱線：29290000、27860099
報料傳真：26239278
報料電郵：[email protected]