原來唔只新股旺場，細價股亦輪流炒高，最新就有凱暉國際（269）加入戰團，昨日無端急升11.92％，收0.169元，而且隻股唔係亁炒，成交股數有2.06億股，金額3472萬元。
經紀陳話，凱暉早排股權出現變動，跟住就話去河南搞石油化工，兼且傳聞仲有古仔跟尾，真係動作多多，睇嚟冇咁快炒完。
凱暉上星期公布，以每股0.128元，向5名投資者合共配售1.95億股新股，集資2500萬元。雖然隻股起步炒上冇耐，但接咗貨嘅投資者，賬面已經賺咗3成。
御泰國際炒高抽水
另外，經紀陳日講夜講嘅御泰國際（155），昨日有1億幾股大手上板，市傳又有強者接貨，股價則繼續升唔停，收0.63元，再升14.55％，成交股數2.96億股，金額1.72億元。
市後傳來消息，御泰國際搞批股，最多批3億股，配售價0.59元，集資可達1.8億元左右。既然抽水目標已達，睇嚟隻股可以休息吓，遲啲再炒。
慕容小初