今個星期連續三日都見到阿Jack蘇澤光，前日講now財經台，噚日以電影發展委員會主席身份，同施南生及影視處處長黃浪詩一齊見記者，今日就出席消費者委員會嗰酒會。
消委會話唔係李家二少爺畀人投訴，而係《選擇》月刊出版30周年兼多媒體服務啟動儀式，即係以後大家可以喺二少嘅跨媒體平台上睇到《選擇》！話時話，消委會張帖就渣啲，扮神秘，但係酒會地點喺8號仔大本營14樓，唔通同二少租場？
至於噚日個活動，Jack蘇話電影發展委員會成立咗三個月，只開得兩次會，之後幾位召集人又計劃呢樣、建議政府嗰樣，即係乜都未做到，不過有呢班有心人點都好過冇嘅。外面傳Jack蘇會接手九鐵呢個燙手山芋，可能佢知記者想追問，所以活動完咗即刻閃電鬆人。