最近嘅大新聞，唔使講都知係九鐵班夥計作反，夾計迫老細走人。呢啲事喺商界簡直係奇聞，你話董事會通過要主席辭職就見過，但由夥計寫信畀董事局，叫佢哋炒咗主席魷魚，就真係大開眼界。
老實講，呢單嘢除咗因為九鐵係公營機構而變成政治事件，其實骨子裏係我哋班會計佬日講夜講嘅公司管治問題。甚麼問責文化、權責分工、上呈下達，咪就係公司管治嘅精粹囉。弊在呢啲嘢正正經經講，就會悶到人反艇，所以唔會有人關心。反而九鐵高層震盪如何帶來政治影響，就精采過無綫劇集多多聲，有乜辦法唔妹仔大過主人婆，個個掛住睇八卦嘢，而懶理甚麼公唔公司管治吖。
雖然呢啲係悶嘢，但都係搵錢嘢。田二少都要為九鐵引入問責文化，就證明提升公司管治係大勢所趨，所以連交易所都出咗份指引要啲上市公司點跟點跟。話就話呢份嘢唔係好有牙力，唔使拉人封舖咁大件事，不過好多上市公司都會做番啲嘢，費事俾啲行家比下去。
會計師自從將啲顧問分部賣得嘅賣，摺得嘅摺，都好耐冇啲新嘢愛嚟兜生意。但自從啲公司管治加內部監控多人識咗，開始多人問價錢。我阿利間舊舖，都有做吓呢啲生意。雖然唔係大錢，不過山大斬埋有柴t