港股大圍冇睇頭，只有玩個別。恒指噚日跌22點，成交只得231億元，期指更大低水134點，藍籌股暫時確係冇作為，中資股仍係資金追逐對象，國指噚日就升34點。
3月份個市，早輪有唔少人睇淡，但近日芬佬已開始轉口風，話個市落唔到，佢哋仲話唔好睇得太淡，小心俾人挾死。家吓呢個好明顯係基金市，特別係中資股，基金已經閘重貨，有排玩。
基金股通常有較高市場評價同高PE，但滄海亦有遺珠，大慶石化（362）就係其一。以大慶嘅「晒士」計，基金揸貨嘅比例，真係可以話好重磅，佢哋上個月接連增持後，要申報持股量的6大基金，就揸咗42.82%，佢哋包括PopeAssetManagement、德意志同INGGroupN.V.等，加埋其他未需申報嘅，相信基金嘅持股量應在50%過外。一隻股票，基金揸過半數，冇幾多隻。
預期PE不足7倍
大慶發行16.8億股，大股東亨泰（197）持有15.82%，第2大股東陳遠東揸11.84%，街外流通貨量在3億股上下，市值只1.5億元，基金要出擊，砌上去，話都冇咁易。
大慶主營潤滑油、防腐塗料及醋酸乙烯產銷業務，05年度（6月底結算），營業額6.94億元，升67.7%；獲利8575萬元，升28.3%；每股盈利6.3仙，減11.2%，股東資金6億元，或每股0.413元。
集團雖面對成本上升，但透過改良產品，以及與客戶關係良好而成功調升售價，紓緩原油價格上升的壓力，公司已計劃從油化工產業轉型至煤化工產業，提升毛利率，而今年就樹脂（PVC）產品的技術改造完成後，利潤率更可由現時的20%至30%提升一倍。
現年度，估計大慶盈利可上升到1.25億元，每股盈利7.5仙，預測PE僅6.8倍，以基金股而言，PE有機會上番10至12倍。
踏入06年，大慶由0.35元起步，2月中升上0.54元後出現調整，形成上升三角形，上周破位而上，又完成後抽，現時升勢再起，照度上去，短線目標係0.67元。
郭兆誠