滙豐大班鄭海泉噚日相當頻撲，朝早11點喺總行幫「我的維港」設計比賽做主禮人，下晝兩點就去四季酒店，出席信德銀團簽約儀式，據聞兩個活動中間仲有個會要開，大班真係唔易做。
唔知係咪忙得滯，大班講到自己理想嘅維港時，竟然話希望可以釣到魚，釣到海豚……搞到在場人士笑唔停口！華華問大班，佢以前拍拖嗰時，有冇同老婆坐船遊維港？佢就笑住叫華華自己搵鄭太問吓，因為呢啲往事太太先會記得。
設計比賽由海港商界論壇主辦，而鄭大班就係呢個論壇嘅發言人，為咗令多啲人注意呢件事，滙豐專登揀喺41樓開記招，事關呢層樓有個戶外平台，可以睇到成個維港靚景，咁都未夠，再請埋一班小學生到場，同鄭大班齊齊影張大合照。