有港版梵爾賽宮之稱嘅極級豪宅深水灣道三十七號，風聞業主最近低調咁搵咗間國際測量師行，開價四億銀放盤，呎價大約兩萬五。
呢座別墅外形夠晒經典，業主身世更加撲朔迷離，翻查土地註冊處紀錄，現任業主明欣發展有限公司，二千年用兩億六千萬，喺創律集團主席徐曾平手上買佢番嚟，先搵廣東省銀行（𠵱家嘅中國銀行）做一按，舊年一月再做埋二按。
明欣背景詭秘，由兩間英屬處女島公司控制，坊間傳聞話事人喺北京做大生意，同徐曾平都有啲關係，所以佢九九年用兩億五向樂星電子買間大屋番嚟，冇乜住過就用「友誼價」賣畀明欣。
呢間深水灣道三十七號屋，佔地兩萬二千呎，最初係榮利集團盧文端所有，九四年樓市大旺，盧以兩億銀賣畀樂聲電子，花咗四年時間精雕細琢成一座萬六呎巨宅，聽講總投資額去到三億三千萬。
徐曾平九八年先以億六投咗艘烏克蘭航空母艦，再以筍價買入呢間外貌睇仲豪過李嘉誠、何鴻燊同鄭裕彤所住大宅嘅巨無霸屋，轟動全城。
電郵地址：[email protected]