噚日話廖秀冬烏冬冬懵盛盛，九鐵爆大鑊佢竟然話收唔到風，引起好大迴響。有人同情佢，話佢上次被煲呔在早禱會拍枱大鬧之後，今次又硬食一鑊，而煲呔就閃開唔上身。但亦有人話佢無能，咁多年一事無成，好似條沙中線，已經變咗「失蹤線」！
所謂高官問責制，究竟乜嘢貨色，大家已經睇到晒。當年好多人批評班局長攞三百萬人工太高，八方就認為，如果佢哋掂，攞三千萬都唔多，因為做妥一件事同做錯一件事，關係可能係幾億幾十億。即如條沙中線，當年大鑼大鼓，九鐵地鐵去投標，使咗幾多錢唔好講，沙田、慈雲山、土瓜灣、紅磡等區嘅市民，望穿秋水冇車搭，社會損失你話幾大？
議而不決，一條失蹤線反映晒；庸官誤人，一場九鐵風波顯示晒。溫總話「知難而進」，特區上下大班A字膊高官，會唔會面紅呢，你話？
爆料熱線：29290000、27860099
報料傳真：26239278
報料電郵：[email protected]