「我最愛冬天飄下軟軟雪花……」，一首我很喜愛的舊歌歌詞，除了在滑雪時，我更愛在泡露天溫泉時哼着這首歌，看着飄雪。
輕井沢的滑雪場跟溫泉區分開一段距離，大型溫泉館有專巴到酒店接載顧客，但不喜歡限時限刻地一隊鴨仔團式的行程，所以專揀臨關門前約一小時，顧客較少的時候前往，四個人夾份搭的士，車程大約十五分鐘，車費約二百元港幣，冇幾可，冇所謂啦。
未出發，先興奮，因為已開始下雪，看見飛雪迎面灑向擋風玻璃，像置身《星球大戰》的飛船內以光速飛行，趁機瀏覽窗外的輕井沢小鎮風情，用簡單英語加身體語言問的士司機先生：「Karuizawa（輕井沢），AnyDisco?Karaoke?AnyNightLife?」好不容易司機先生搞明白，雙手立即像超人狄加般在心口打個交叉，「Da咩！」司機先生說，即係乜都冇，浸完溫泉可以叠埋心水瞓覺。
入浴費每位約五十元港幣，記住去之前先在酒店拿折扣券，若自攜酒店毛巾則再慳十元毛巾費。本人對日本人的廁所衷心佩服，乾爽、整齊、氣味清新，女清潔工人睬你都儍，管你們一幫大男人有長有短，只埋頭把自己的皇國打理得乾乾淨淨。
拒絕浸堂內溫泉，在高溫熱水中呼吸潮濕的熱空氣是集中營式的酷刑，直接踏着積雪赤條條的跳入戶外溫泉，是夜天公造美，一直下雪，幾個大男人互相擦着背，賞着雪，泡着溫泉，李超人都冇我哋咁歎！