全國政協同埋人大會議相繼閉幕。祖國中央政府今次乘機向兩岸四地的人民，解釋未來會推行的政策。傳媒自然將焦點放在兩岸問題上，雖然這個問題由1949年到𠵱家都未解決，不過都唔好話冇變數，唔好話唔值得關注。
如果兩岸有乜依郁打起上來，台北食飛彈，我哋香港作為祖國首屈一指的城市，亦必然會食飛彈，又如果到時添馬艦已經變成政府總部，一支巡航導彈，就可以擺平解放軍、國務院，同埋我哋特區政府駐港總部。作為特區人民，都唔好話唔驚，唔知民建聯係唔係收到「內部」Memo，有先見之明提出要「遷都」到九龍？
當然，孫柏文隻金手指，都希望從政協人大會議中提過的新政策方向，為大家篤一個投資機會。兩岸問題實在太多變數，金手指都諗唔到從哪個角度去提供投資建議，只不過希望天下太平，阿彌陀佛！反而孫柏文覺得最有投資價值的新政策，就是領導人對環保的方向。
多種迹象顯示，祖國今次對環保真係好認真。孫柏文成日話，如果將政府比喻為一家之主，政策是分三大層面。第一層係國防。打個比喻，如果有人爬入你屋企，攞支槍對住你家小，你第一時間梗係諗點樣可以趕走個賊，仲邊會有心情諗下一餐開唔開到飯？
第三層發展階段
再提升一個層面。當個賊走咗，屋企又換埋新鎖，不過你冇工開，擔心下一餐開唔開到飯，屋企人係唔會有閒情去管你啲「二手煙」，更加唔會諗究竟十年八年之後會唔會令家人患上癌症。第三層，當你步入小康，開始計劃未來，你同屋企就會開始擔心「二手煙」危害健康。
世界各國的環保運動，都是國家去到第三層的發展階段，才有足夠的國民支持而成功。祖國經過多年來的經濟發展，應開始進入第三層的發展階段。中央政府政策的軍火庫內，對促進環保確實有一個強大武器，就是「能源價格市場化」。
現在電油、柴油、電力都是控制在市場價格之下，令到短缺、浪費、排隊等市場失調症狀出現。如果能源價格可以提升到市場價格的程度，中央政府便可以利用「貪錢」商人希望增加成本效益的動力，去達成環保這個目標。最後給讀者一個投資建議，如果石油副產品價格因環保市場化，最大得益者必是中石化（386）。所以想炒環保概念，一定要買中石化。
孫柏文