有個從未試過買樓收租嘅投資初哥，睇中一個賣咗十幾年都未賣晒嘅樓盤，重一口氣買入兩個單位，涉及金額達六百三十萬。
上述事件發生喺啱啱過去嘅周末，有個好有水嘅買家，認為銀行存款利息過低，決定買樓收租，偏偏全港咁多新盤二手盤俾佢揀，佢淨係睇中空置咗十幾年嘅碧濤花園，而且一連買入兩個，用嚟長線收租。
利嘉閣區域經理徐子豪話，雖然買家係投資新手，不過入市前都有做過功課，知道九鐵大圍車廠上蓋項目，啱啱批出補地價額，每呎三千三百幾，睇好區內物業升值潛力，就算唔再收租，賣出都有錢賺。佢買入兩伙都係二期富臨閣中層H室，面積各一千呎，呎價三千一百幾，以每個單位月租萬五蚊，每月有三萬蚊租，回報率有五厘七，好過放喺銀行收息。