始終都係較喜歡李連杰嘅古裝造型！甚麼《不死狗》、《最後一強》打到天花龍鳳，都好難叫戲迷投入；重飾中國一代武術宗師《霍元甲》，馬上又勁收旺場！可能《霍》係李連杰動作電影收山之作，感覺特別打得狠！小量文場、7成武戲，再加第一武指袁和平作幕後黑手，將中西各國不同武術與中國傳統武術來個大較技！
記者：朱崇德
碟迷對《霍》的一大關心重點，相信係「完全版」問題！傳聞戲院上畫時由於Cut了楊紫瓊及泰國拳王的戲份，所以電影長度由143分鐘大大縮短至104分鐘，所以睇落硬係斷吓斷吓，唔夠過癮！喺度話畀大家知，DVD片長維持「原」判，沒有加料，不過睇MakingOf時真係有泰國拳王資料，行內人好多估死佢會出加碟版，不過官方當然暫時沒有任何公布啦！
港產公式橋段
電影橋段相當港產武打片公式，話說李所飾的霍元甲，自幼不學無術，老父要佢先文、後武，但佢偏偏偷練；一次孩提戲耍打擂台的挫敗，令佢興起唔輸得嘅好勝之心，不惜以種種狠辣手段，誓要成為津門第一！由於鋒芒太露加上性格傲慢浮躁，後竟錯手殺了天津第一高手──秦爺，不過代價是賠上家中老母及幼女性命；此時此刻，李才自省過來，並在多年的流浪生涯中，悟出了「武德」及後世享負盛名的迷蹤拳；這時適值世界列強欺凌中國人的時間，並以西洋武術銳挫中國人。為洗脫東亞病夫惡名，霍憤然再上擂台，並創立精武體育會，以武術喚醒國民團結之心。
6.1聲效拳拳到肉
喜歡動作場面的戲迷，今次可以過足戲癮，電影七成時間都係打到九彩，加埋dts5.1及dtsES6.1炸爆機嘅聲效，絕對聲畫雙絕！電影前半段李飾演一個浮誇版霍元甲，打高台樁、以一敵十，招招去盡兼狠辣，加上被打嘅武師功夫底又夠厚，絕對打出身價；全劇高潮位係秦爺一段，除咗係故事轉捩點外，一把九環刀舞得虎虎生威，及至最後李的慘勝，絕對係最悲壯的一幕！
尾段以中國功夫，對戰英國拳王、西班牙劍客及普魯士長矛高手，都算打出新意，不過相對前段拳拳到肉的中國功夫，同刻意打倒「洋鬼子」嘅意識，硬係予人有種矯揉造作之感；《霍》雖然文戲着墨唔多，但描寫農敬蓀一段兄弟情都相當獨到，加埋結尾對戰日本高手的慘烈打法，都能做到賺人熱淚，算臨尾攞番個尾彩。
翻炒舊製作特輯
特別收錄都幾弱吓，預告片、廣告片、相片集、導演及演員文字介紹，都係相當流吓！唯一可睇是近10分鐘的「製作特輯」，不過除畫質差外，中文字幕仲好似VCD咁「不能消除」嗰隻；如果大家喺電視播時錯過咗睇，今次可以補番數！
