華華最近收到一位舊街坊嘅來信，就係精電國際（0710）行政總裁蔡東豪，原來佢哋換咗嗰新Logo，大大個綠色勝利手勢V字，據講係代表佢哋個英文名Varitronix，象徵穩妥的服務，同埋勝利，喺左上角有藍、綠、紅組成的「＋」號，代表為客戶提供全面嘅增值服務。
精電國際專做液晶顯示器及有關產品，佢哋間廠原本喺將軍澳工業邨，在壹傳媒隔籬，華華都試過行路過去探張樹成主席。後來佢哋將生產線搬晒去大陸，只留番設計及研究部喺香港，咪索性搬出去觀塘。
張樹成喺1978年創立嘅精電，91年上市，做到有聲有色，可惜佢啲仔女對呢瓣嘢冇乜興趣，竟然唔肯接手，張樹成惟有向外搵人接手，蔡東豪亦因此加盟，做行政總裁兼執行董事，張主席就掛個名，唔做大股東，諗住逐步引退。