港股今回肯跟美日股市上去，恒指升97點，收市後期指再升多25點左右。中移動（941）、滙控（005）同中海油（883），總共拉高恒指58點，包咗恒指升幅6成。個市升勢未係全面（即係隻隻升），上便仲有水位。
昨日提及嘅新地C輪9791跌4%，畀啲耐性揸落去。領匯C輪4509則有睇頭，正股（823）升30仙，隻輪升2.5仙，收22.4仙。正股做緊嘢，4509有排至到價，坐定定，咪兩頭擰，等正股上番17.50元先至收割。
中銀C輪3670：滙控、東亞（023）同好多隻銀行股向上郁，中銀（2388）只係向上移咗斗零咁大把。乜中銀唔係銀行股咩？中銀國內母公司中行，上周五宣布去年多賺1/3，中銀盤數個半禮拜後至知，唔會失禮，買定C輪有米搵。
中銀C輪，揀仙士輪玩，可向3670埋手。隻輪10月尾到期，輪價8.6仙，溢價4.7%，槓桿率17.6倍（有效8.7倍），引伸波幅21.2%。
國壽C輪4452：國壽（2628）又嚟過，收8.70元，升0.35元。揀C輪短炒，向4452埋手。隻輪7月下旬夠鐘，輪價98仙，溢價5.3%，槓桿率8.9倍（有效6.1倍），引伸波幅30.9%。如果唔嫌交投冷淡，則可諗2188。
章盛