噚日講過now財經台，今日自然要嚟個科撈Up，畀大家知道小小超呢個中文CNBC究竟點搞，仲有二少想收大家幾多銀！原來月費盛惠30大元，新客仔喺4月20日前申請就可以半價15蚊，咁一向以豪爽見稱嘅二少，梗唔會賴低佢啲忠實粉絲，所以𠵱家佢嗰50萬now客仔，可以免費睇半年，貫徹佢咩都鍾意玩半年嘅性格！
講番噚日個記者會，最後無啦啦又由8號仔大本營改番去灣仔now財經台總部開，好似話貪有Feel喎！現場所見又係幾有CNBCFeel，除咗提過以Jack蘇為首嘅4人男子組，當然唔少得財經台個首席主播徐蕙儀同埋高級主播林燕玲（即係以前喺TVB起朵嘅小飛俠），有冇之前主人家預告嗰種驚艷？唔……華華只可以講，呢啲嘢好主觀囉。
至於老細對個台有乜期望，Jack哥話財經台個口號係「將資訊變成創富力的電視台」，佢哋有駐台專家又有咁多新聞界精英，仲會喺十間經紀行盤房擺埋攝錄機……簡單講，即係無敵囉！
由於8號仔就快派成績表，Jack哥真係冇咩好講。咁呢幾日九鐵兵變，嚟自地鐵嘅佢，又未正式公布約滿後去定留，所以大家好自然跳落呢個Topic，Jack哥話，佢續唔續約同人家地震係兩件事，佢又話不在其位不謀其政，唔會Comment田少做成點，有啲行家話佢答得「行」；唉，唔通大家想佢答「我做就唔會咁啦」咩！
李華華
讀者如有任何意見或報料，歡迎發送電郵至[email protected]。
