自製馬仔夠黐最好

60年代，馬迷有句馳名口頭禪：「食馬仔，贏馬仔！」時移世易，今日球迷多個馬迷，馬仔亦因製作繁複有違健康而逐漸式微，現存有馬仔售賣的酒家計落不足10間，銅鑼灣西苑便屬碩果僅存派。這裏的馬仔堅持不加防腐劑，每朝新鮮製作，為符合飲食健康潮流，棄花生油取植物油，糖漿調得較稀身淡味，食落無油膉味，鬆化程度拎上手大力少少都會散開。已有25年做點心經驗的波哥笑住話：「係呀，我哋嘅糖漿校稀咗，做到啱啱夠黐，咁食落就更加鬆脆啦！你平時食到嘅馬仔黐牙係因為糖漿太濃，或者放得太耐，記住馬仔放得耐或者用油太多都會有油膉味㗎！」
其實好多經典小食因為唔夠健康而被淘汰，計我話只要多啲人願意花心思改良，經典糕餅一樣大有市場！

擁躉古生：細細個3、4歲已經食馬仔食到大，呢度嘅馬仔無咁油膉無咁甜，健康啲。