楊千嬅和肥媽瑪利亞同是鑽石水代言人，前晚二人同演出音樂會，千嬅獲安排唱四首歌，肥媽則唱六首，不但有性感女舞蹈員陪襯，還大玩親情，十分搶鏡。
楊千嬅、古巨基、肥媽瑪利亞、方力申和鄧麗欣等前晚在會展演出「鑽石健康水慈善演唱會」，千嬅打頭陣出場唱四首歌，基仔壓軸唱三首，肥媽則是演出時間最長的歌手，在中段一口氣唱六首歌，且觀眾情緒高漲，反應甚佳，可說是薑愈老愈辣。千嬅與肥媽同是該產品代言人，獻唱時間長短各異，顯然有差別待遇。
「我好鍾意唱歌」
成為主要演出歌手的肥媽，施展渾身解數，找來一班穿着性感森巴舞衣的女舞蹈員伴舞，甚懂搞氣氛，不停叫觀眾到台前跳舞，fans附和上前拍照及握手，肥媽來者不拒，將演唱會升溫。肥媽又刻意到台前與其奶奶握手，逗得奶奶很高興，在獻唱《MaMaIloveyou》時，談到其母親忍不住流淚，場面感人。
對於獲厚待，肥媽說：「我嫌唱得少呀，本來大會預咗一個鐘畀我唱歌同講嘢，畀我唱八首歌都唔夠啦。我好鍾意唱歌㗎，唱一晚都得。」問到她與千嬅同是代言人，似乎她較得寵，她說：「唔會，唔係唱多就一定係好，咁唔代表勁，勁嘅話唱一首都OK啦，𠵱家逐首歌計㗎嘛，有得唱已經好好。」
約狗仔隊去上海
不過千嬅仍賣口乖說：「唱幾首都冇所謂，呢件事係慈善活動，幫健康快車籌款，我覺得有支持就OK，個客心地咁好，我唔介意。」對於日前廣州一個頒獎禮，因千嬅不出席而將獎項都頒給容祖兒，千嬅說：「我要去南京做廣告記者會，收錢簽晒約唔去唔得，我搵錢緊要，幾十歲人難免有是非，唔理得咁多。」千嬅稍後要到上海拍劇，她竟說：「狗仔隊上嚟影嘢冇所謂，記得帶啲嘢食嚟。其實我最怕喺荒山野嶺去廁所，俾風吹住好驚㗎。」
採訪：王連連
攝影：陳俊強
