名校除咗學位多人爭之外，有錢有面嘅校友都特別多，好似有一百三十一年歷史嘅聖約瑟書院，近日就收到三個校友：利國偉、李國賢及名醫李仲賢兄弟，合共二百二十萬元捐款，書院基金會主席李國寶親自接收支票，舊生梁智鴻及何承天，都有到來捧場，真係人多好辦事。
噚日六十七歲生日嘅寶哥哥，晏晝已經同班同事去咗鏞記食鵝，晚黑就約咗屋企人去國金二期嘅Harlan's食飯慶祝。佢同八方講，喺聖約瑟只係讀咗兩年，之後就去咗英國，但因為學校嘅新舊禮堂，都係佢哋李家捐建嘅，所以對間學校都好有感情。
利Sir年紀大，自己冇嚟，但就派咗個女同女婿到場，金鞋金手袋襯綠色外套嘅Annie話，成日都有同父母見面，兩老精神都唔錯，爸爸日日都有做運動，間唔中又出去同朋友食吓飯，只係少啲出席公開活動。
另一個捐款人，有份反對港大醫學院改名嘅名醫李仲賢，見到八方就係咁講番佢半個世紀前嘅威水事，事關當年佢、細佬國賢，以及喺尤德時代做工商司嘅何鴻鑾，三個係同班同學，又係全港年紀最細嘅會考畢業生，今時今日就各有成就，你話威唔威喇？
爆料熱線：29290000、27860099
報料傳真：26239278
報料電郵：[email protected]
