上星期六早上起床，十份報紙已經送到屋企，《蘋果》頭版非常搶眼，就係九鐵兵變迫田北辰落台，乜咁激呀？但係呢段新聞，只有《蘋果》與《明報》在頭版報道，其他報紙對此十分低調，屬比較少見事例。
公營機構兵變，由管理人員發動，要求主席下台，從未見過。但係田二少任九鐵主席多年，作風十分強悍，以前令到老波骨楊啟彥冇晒面，代楊啟彥嘅黎文熹一直做署理行政總裁，署理兩年，都未見真除，有乜理由呀？如果黎文熹冇料，署理最多兩年就請過第二位叻啲㗎啦，如果話黎文熹做得嚟，點解唔將佢升正？世界上邊度會有大機構容許一位「永遠署理行政總裁」存在㗎？有此現象，田北辰與九鐵董事會（叫做九鐵管理局）難辭其咎，環境運輸及工務局局長廖秀冬坐喺局內，點解冇做嘢？其他管理局成員唔通冚扮爛都係橡皮圖章？如果田北辰下台，全部管理局成員應該集體總辭，一個都冇得留低。
田二少係長春藤名校康奈爾畢業生，哈佛MBA，讀書叻過阿哥北俊好多，田大少喺SanJose讀碩士，學校地位/排名與哈佛差一大截，但若論做事，田北俊雖然一樣有少爺脾氣，但比細佬圓融得多。哈佛管理，世界聞名，但若以田二少管理九鐵嘅作風為例，讀聖荷西州立大學都唔會點失禮喎，起碼學費比哈佛便宜好多好多。
曾特首與特首辦主任都係哈佛校友，知道九鐵兵變，如何處理田二少呢位哈佛校友呢？咁嘞，地鐵嗰位主席錢果豐博士出身於另一長春藤名校UPenn，認真識得做人做事，地鐵公眾事務全部由行政總裁周松崗爵士（威斯康辛大學畢業，中文大學MBA）搞掂，絕不搶鋒頭，你睇吓地鐵業績幾咁好，一於下令地鐵九鐵合併啦，由錢博士周爵士管晒，曾特首可以瞓得安樂。