馬浚偉日前喺慈善節目《博愛歡樂傳萬家》入面，同李彩華（Rain）跳拉丁舞，但佢隻手就掂到Rain嘅重要部位。噚日馬仔接受商台訪問，就猛話唔係，重強調同Rain識咗好耐，大家好熟。
噚日馬浚偉一見記者，就即刻話：「點會呀？點會喺二百萬觀眾面前做鹹豬手呀？嗰陣個動作好危險，Rain又跣緊落地，如果唔托住佢，就會跌落地，好自然反應啫，好彩我啲手指反向出面㗎！」
馬浚偉又話平時同女星影相搭膊或者拍kiss戲，都會同個女仔講聲會點做，以避免不必要嘅誤會。
望拍檔體諒
馬仔重話事前同Rain溝通過，佢話：「跳呢啲辣身舞實有危險，實會有close啲嘅身體接觸。我跳舞又水皮，之前都有同Rain傾過，講明跳舞唔叻，啲動作要飛來飛去，有乜尷尬就體諒吓。之前我同郭羨妮跳過呢啲舞，都有傾過㗎，有時唔係自己尷尬，只係怕掂到人啫。」而Rain亦有接受商台電話訪問，就話相信馬仔，再合作都冇所謂。
