港股回升，恒指高收15542，升97點，中資股表現更突出，H指收6274，升100點；升降指數繼續強勢，升跌股數（俱不計認股證）係439同240隻，市場氣氛又再轉熱。
大市跌唔落，上周三的15348有可能係底，但藍籌股短期唔會有大作為，市場資金已堆晒落中資股身上，恒指會如預期般在窄幅內上落，中資股則繼續精采。
中資股調整完成，首先發力嘅係資源股、保險股同地產股，華潤置地（1109）最強勢，搶上4.725元，同月初的歷史高價只係相差1個位；中國海外（688）高位4.35元，亦好快追近2月初的4.475元。內地地產股轉強勢，上周推介的新世界中國（917）亦發威，搶上3.95元後回收3.875元，升6.1%，且成交大增，走勢已明顯出現突破，可以上移止賺位繼續持有，目標4.50元。
噚日大升股中，益安國際（082）要昅實，聽聞公司未來一兩個月內會有連串動作，股價有機會重上1元的高位水平。
候低設止蝕位吸納
益安去年收購營口鋼鐵唔成，一輪洗倉，股價跌到0.24元才反彈。今年1月底時急升幾日，整固一輪，噚日又再飆升，成交1475萬股，更係05年4月中以來的最高紀錄，今次升破長期下降軌，且有大成交支持，短線上升目標係0.60元，整固後再上，可見0.80元。
上月中，益安董事局人事大變動，加上公司又已宣布與獨立第3方商討收購事項，顯然公司在「療傷」後，再計劃進軍新業務，而董事局的新人事亦帶來新作風，從近期股價大為轉強，已可得見。
聽聞益安所洽購的，係近期好熱門、同好具爆炸力嘅項目。噚日，公司出通告話仍未簽訂協議，但股價仍然一路搶上，最高0.51元，收0.495元，大升19.2%；照計未傾掂係屬利淡消息，但買家仍狂勇追貨，顯然智珠在握。
益安發行只7億多股，市值約3.5億元，若收購成事，公司「晒士」肯定會擴大，一直搵「寶藏」投資嘅基金會陸續進場。益安急升後料會出現調整，可候回軟時低吸，但要定下止蝕位，博中線上升1倍。
郭兆誠