食環處：迷人清香櫻Lady

大和民族愛好賞櫻花，每年四月櫻花節，東京賞櫻名所「上野公園」及「新宿御苑」例牌擠滿人。無幸身處其中的香港人，或許應以清香的櫻花盛宴先祭祭五臟，來個色香味俱收，映入眼簾的粉色風景同樣精緻宜人，小記亦恍如劉姥姥遊大觀園，眼見如此美景，嘩聲四起，算是偷步感受春日良辰。

記者：陳慧茵
攝影：陳偉強
Model：Ellen@Salvador
服裝：美麗人生（27891303）

似足懷石料理不時不吃

踏入春天，各餐館奉行「以花入饌」的例行公式，日本菜的頭號選擇自然是櫻花Sakura。負責設計櫻花宴的Raymond：「今次係吉祥首次推出櫻花宴，希望將傳統日本飲食文化帶到香港。櫻花宴嘅概念源自京都，由江戶時代已經盛行，京都人出名對食物考究，所以今次櫻花宴亦似足京都懷石料理，奉行不時不吃、賣相精緻嘅基本原則。」

嗌Set再散叫最抵食

食櫻文化在日本盛行已久，Raymond坦言：「櫻花感覺優雅清簡，所以櫻花宴嘅菜式亦以清淡為主，坦白講櫻花其實無乜味道，主要借用佢嘅顏色令食物賣相更靚，例如我哋會用櫻花花瓣浸水，釋放嘅色素將其他食物染成粉紅色，又或者將花瓣磨碎，混入同樣粉紅色嘅日本門鱔魚魚碎，製成粉末灑上碟面裝飾，至於清香嘅櫻花葉就主要用嚟包裹食物例如米粿之類。」
話明懷石料理，一頓櫻花宴七道菜（$530/位），起碼預留一小時享用，食時亦奉行由清淡至濃味的考究食序，至於想輕嚐淺嚼的，所有櫻花料理均可散叫，不過個人認為叫Set較優惠，兩位女士Share一個再叫1-2客小食剛剛好，試過諗過再散叫Encore最實際。

01櫻葉米粿　$60

米粿可謂櫻花饅頭的甜食版，鯛魚肉變成日本紅豆茸，糯米改以日本上白糖同蒸，味道帶淡淡甜味。米粿會與加入櫻花瓣的雪糕同時上碟。

02大蛤櫻花湯　$45

大蛤即日本桂花蚌，豆腐特意雕成花形應題，蚌殼上的粉紅糰物以櫻花瓣碎混合粉紅肉質的日本門鱔肉製成，口感似日本魚蛋，入口木魚清湯帶麵豉香而不鹹，清甜四溢。

03東京灣櫻鯛薄切　$250

鯛魚別名「櫻鯛」，與櫻花同為三、四月當造，肉質爽滑味帶清鮮，師傅於面層灑上小量柚子茸，入口清香撲鼻，夾雜魚子的鮮甜，屬精心細緻的配搭。不過更讓人歎為觀止是那恍如ArtPiece的食物裝潢，單單以蘿蔔絲堆撐起的魚網，已是「妹仔大過主人婆」的絕佳寫照。

04蒸鯛立櫻花饅頭$80

以櫻花瓣浸染過的糯米質感煙韌，內藏鮮甜鯛魚肉，再以醃漬過的櫻花葉包裹，是傳統櫻花饌的必備食物。

05櫻卷．櫻金槍魚壽司．燒櫻鯛壽司$180

a)櫻卷：懷石料理講究不時不吃，櫻卷夾以帶子、海膽及櫻蝦三種當造食材，味道鮮甜得無話可說，一碟六件卷物已用上三十隻只有一毫米闊的櫻蝦，單是來貨價已約四十元，認真重本。

b)櫻金槍魚壽司：小小一件壽司，包含吞拿魚碎、櫻蝦、三文魚子、牛油果等豐富材料，入口先是魚子的鹹鮮，接着滲出蝦的鮮甜及柚子清香，尾段吊出葱的辛辣，挑戰味蕾之作。

c)燒櫻鯛壽司：以110度猛火燒炙30秒的櫻鯛，入口啖啖脂香，鹽漬昆布碎吸收魚味鹹香，食時根本不用添加任何醬油。