雖然有唔少經濟學家前輩都非常之睇唔起博弈論，認為博弈論嘅分析有太多假設，對學術研究冇乜作用。不過利世民閒時都會試吓用博弈論嘅方法分析吓啲事，其實都幾盞鬼。好似呢幾日鬧得熱烘烘嘅九鐵逼宮案，利世民就試用博弈論拆局。結果連自己都嚇吓一跳。
九鐵逼宮案有三個主角，分別係以森姆．黎為首嘅官僚經理、田二少為首嘅董事，以及特區政府。第一主角森姆．黎發起逼宮，成個中環都大惑不解，因為打工仔（特別係公營機構嘅打工仔）除咗求財求平穩安定，再大怨氣最多都係劈炮唔撈。𠵱家佢將件事提升至特區最高政策層面，其實內心要作極大掙扎。
森姆．黎嘅決定，完全出於佢對田二少嘅反應估計，而田二少嘅決定，完全出於佢對特區政府反應嘅估計。所以推論嘅第一步，係要諗吓政府立場。眾所周知，政府最緊要係可以順利推行鐵路政策，其實邊個做又有乜所謂？政府鐵路政策下一步，最緊要就係「兩鐵合併」，正路嚟講，留唔留田二少主要係睇會唔會有助兩鐵合併。坊間傳言，田二少以及董事局響合併問題上係有少許阻力。所以政府分分鐘會做順水人情，由得田二少「功成身退」。如果森姆．黎睇通呢點，就知道逼宮係可以得到特區領導支持。
不過呢件事亦唔係冇代價。首先總要有人要為「混亂」負上責任，最順理成章要揹鑊嘅人就係冬菇。又有坊間傳言，曾特首對冬菇亦唔係非常愛錫，如果話呢次係有一箭雙鵰嘅效應，亦唔算太過份。利世民講呢件事，無非都係想用一個實例去話畀大家知，每次有大件事，往往最關鍵人物都唔係第一個出招嗰位。高手，就係高在點樣令到人覺得佢哋響被動之下作出決定，呢個亦係博弈論嘅精髓所在。
除咗政策，其實博弈論都可以分析好多商戰策略，利世民有機會再慢慢同大家講古仔。
利世民