近日天氣濕𣲷𣲷，搞到食飯都無嚟胃口，所以去渣華道街巿買餸嗰陣，順便問吓靚姐今期有咩好推介，同記儀姐就推介我買大紅椒，話近排當造，隻隻都又紅又大，用嚟炒牛肉、釀魚肉都得，想開胃啲，可以配埋青椒、黃椒切絲嚟整沙律，顏色夠晒豐富包你食慾大增。
儀姐仲話：「揀紅椒嗰陣，最緊要就係要夠大同夠硬身，拎上手仲要夠重，個椗要夠青綠，咁就最新鮮。」
快炒免維他命流失
不過煮嘅時候就要特別注意，千祈唔好用水烚咁耐，因為用水煮得太耐會令內裏的維他命流失，所以最好嘅煮法就係要快炒，或者就咁洗乾淨切絲做沙律，咁就可以保存到紅椒內所含的維他命A、C同E。另外，無論紅椒或青椒都有抗氧化作用，可以對抗自由基，多吃還有助防衰老㖭！