陳奕迅被傳在下周四與徐濠縈舉行婚禮後，本月底便到內地與張衞健演出劇集《雙截棍》，並可得約五百萬港元酬金，但因張衞健與製作公司反目，連帶他亦決定放棄演出。
張衞健原定與蕭定一的一席好漢公司合作拍攝新劇《雙截棍》，另一男主角亦傾好了由陳奕迅（Eason）擔任，在劇中扮演一名捕快。而為了拉攏Eason演出，該公司更以五百萬演三十集的可觀酬金作利誘。為了賺奶粉錢，Eason亦為之心動，與蕭定一開始詳談細則條件，可惜在臨近簽約之際，又出現變數。
斟黃子華頂替
原來張衞健與蕭定一最近為該劇開拍延期及在劇本上談不攏，而不歡而散，據悉事後張衞健曾聯絡過Eason，告知他整件事，還建議他重新考慮會否接演該劇，結果Eason與經理人陳家瑛商量後，決定推辭演出，免得捲入是非漩渦。但蕭定一並未有因為張衞健拒絕合作而放棄開拍該劇，後來更找了黃子華頂替他的角色，但黃子華要看過劇本才考慮會否接演。
記者昨日致電給陳家瑛，她表示：「原本Eason係想接拍呢齣劇，但後來發現啲期都幾滿，如果再接埋呢齣劇，真係驚唔夠時間做歌唱事業，最後我同佢商量過，決定放棄接拍，至於張衞健與蕭定一之間的問題，我哋呢方面唔想作出評論。」
記者昨日亦聯絡了張衞健，其弟Henry代回覆說：「我哋冇同蕭定一反面，亦都冇嗌交，佢公司係Dicky（張衞健）嘅代理公司，而我係Dicky嘅經理人，佢公司可以代Dicky拉生意，我呢邊亦可以，不過佢公司接生意之前，應該先取得我呢方嘅同意，唔可以唔按本子辦事，至於《雙截棍》呢齣劇，佢公司開又得，唔開亦得，因為我哋已經收咗錢，但到目前為止，我呢一方就仲未接到開工嘅通告。」
延期開拍劇集
至於蕭定一則在電話中解釋說：「我同張衞健冇反面，只不過因近期古裝劇唔可以上中央台黃金檔，所以齣劇要改劇本，咁必定會順延遲開，張衞健事實為咗咁而唔開心，至於Eason之前係收咗定，但齣劇延遲開，公司咪將啲期畀番佢。」
採訪：葉雪
