華華前幾日喺酒會，見到老牌地產商協成行主席方潤華（圖），82歲嘅佢滿面紅光，好鬼精靈咁話，自己家吓半退休，未完全退落嚟，咪因為自己好動唔停得囉！𠵱家日日都返公司行吓，處理雜務，有時間就去打Golf、游水、做Gym、寫大字，真係快活過神仙！
方伯話，公司同旗下基金嘅事務佔咗佢大半時間，但點忙都一定會留番啲時間陪屋企人，舊年先慶祝完60周年結婚紀念，而佢嗰八個仔女十五個孫，分布喺港美加，所以成日都會同老婆四圍去旅行探兒孫，不過老人家始終都係傳統嘅，農曆年就多數留番喺香港，等仔女返嚟拜年，大家庭成30幾人，食飯都要開三圍，真係好熱鬧！
講番協成行，係佢伯爺方樹泉創立，主要物業有中環嘅協成行中心，即係佢日日都返去「打躉」嗰個大本營，而佢同佢位伯爺最出名嘅，就係兩人都設立咗教育基金，受捐助嘅學府數目多到數唔晒！