每日起身照鏡，又係呢個髮型，真係懨悶到嘔！下定決心變髮，點知又十五十六，係就係可以花千幾蚊畀人染、電甚至駁髮，但隱憂係可能變得更樣衰，喊咁口呻笨囉！唔想整完嗌到坼天，不如試吓買個幾百蚊假髮玩吓，平過你花過千蚊駁髮，兼且持久力十足，至正係可以慢慢揀到啱先買，想點變都得啦！
記者：盧家蕙
攝影：譚盈傑
Model：Karen、Becky、Natalie（Salvador）
Hairandmakeup：HATBYHARVARD哈佛
Bodywave最buy
身為專業髮型師的Christine，她對今年的假髮熱有如此看法：「假髮一向畀人嘅印象都係好假，好硬邦邦，後生女冇乜幾何買假髮作日常咁戴，除非係出席特別場合或party啦！近年風氣唔同咗，日本妹戴咗就掀起熱潮，唔少明星及藝人爭相仿效，假髮不單止是禿頭、頭髮稀疏人士的恩物，更成為潮人必備的髮飾。可能像真度太高，有好些都看不出來。」
今年會流行邊類型假髮呢？「首選係自然嘅bodywave，好似Becky的長鬈髮就最受歡迎，女仔勁buy。」她說，不過話明變髮，一係唔玩，係就玩大佢！最好長變短、短變長，甚至激啲炸開整個麥當勞叔叔頭，一出街係人都認得你啦！假髮通常來自日本及韓國，價錢由百多元至六百幾左右。圈中代表人物首推銳意打造成百變天后的Joey，佢絕對稱得上係假髮嘅忠實fans，無論係拍廣告定CDimage，都喜以不同的假髮look示人。
洗假髮唔好捽
假髮同真髮一樣，都係要洗同吹，Christine說：「假髮唔可以洗得太密，並且用專洗假髮的洗髮水浸洗，千祈唔好不斷捽同摷，之後以毛巾印乾，由佢自然風乾，絕對不可用風筒吹乾。」如果想鬈髮更持久，戴完最好用髮網笠住佢；冇戴一段時間的假髮，得閒就拎出來擺放係通風乾爽的位置，假髮壽命就可延長。
戴髮有序
唔少人一見到假髮，就會即時笠上頭試戴，不過硬係戴極都怪怪哋，多數因為唔識戴，唔想咁戇居，即睇專業髮型師教你戴假髮的正確step。
圓面選 層次假髮
面形偏圓又好肉地嘅女仔，過肩鬈髮最穩陣，短髮也不妨一試，不過一定要夠層次感同有colour，唔係好易變做師奶仔。
Becky：「Babyfat係幾卡娃兒呢，至弊就係頭髮鬆散，唔想負離子的燙貼令包包面更明顯，更加唔敢把心一橫剪短佢！」
化妝Tips
粉色系列的眼影至襯白雪雪的少女，塗粉紅或橙紅的胭脂均可。
瓜仔面 長髮短髮都得
瓜子面的靚女可以話百無禁忌，長髮短髮一樣啱，揀乜都得。
Natalie：「打扮偏向中性，髮型medium-length唔夠女性化，偏偏就留極都唔長，仲要等幾耐先可以一改男仔頭的形象？」
化妝Tips
想女人味滿瀉，唇膏可選鮮紅或偏紅的顏色，眼影也可誇張一點，選用紫、藍色為佳。
國字面 啱短髮
國字面的人不適合又長又齊又貼面嘅負離子，試戴短髮露多少少面珠登反而更爽朗。
Karen：「我面形稍方，過肩長髮睇到有啲悶，唔係紮起就打散，冇厘新意，唔襯我四圍貢、冇時停的形象，染完再電頭髮就會好傷。」
化妝Tips
Sporty可以嚐試今年至興嘅nude妝，誇張的髮型配合不造作的妝容，整體上取得平衡。
玩花款
戴咗假髮都係嫌單調，試試加點髮飾作點綴，吸引力即時大增，平時齋用一樣得。
A）HATBYHARVARD哈佛（27237733）
B）Chanel（28101083）
C）SugarBaby（25763618）
D）ettusais（31021606）