容祖兒、李克勤、陳奕迅和謝霆鋒等前晚齊集廣州天河體育館，出席「9+2音樂先鋒榜2005年度頒獎典禮」，克勤和祖兒雖被傳執二攤頂上，但兩人包辦男、女歌手大獎，並各得四個半獎項，雙雙成為大贏家。 廣州直擊
前晚在廣州舉行的「9+2音樂先鋒榜2005年度頒獎典禮」，有傳男女歌手大獎本來由古巨基和楊千嬅奪得，但二人因工作而缺席，故獎項落入李克勤和容祖兒之手。前晚英皇眾歌手合共奪得十五個半獎，成為大贏家，金牌公司則只得兩個，分別是古巨基的最受歡迎Ｋ歌及側田的新人獎，男新人金獎則落入關智斌手中，千嬅更捧蛋，金牌歌手可能因不滿賽果而全部缺席。
冧莊兩年壓力大
對於被指執基仔二攤得獎，克勤說：「我從來唔信呢啲嘢，今次頒獎禮由十一個電台搞，你當人哋流㗎咩，又唔係得一個，傳聞歸傳聞，參加得就要相信人哋嘅公信力，我抱住一個態度去頒獎禮，攞就高興，攞唔到就出年再嚟過。」
祖兒對於被指執千嬅二攤，奪得最受歡迎女歌手，她說：「唔好再咁講啦，搞到個圈好似冇八卦料咁。其實獎就得幾個，有時你攞有時我攞，各自有得攞先百花齊放。今次我好高興，算係對內地fans有交代。」提到冧莊該獎兩年，祖兒表示：「都幾大壓力，惟有盡力做！」
陳奕迅（Eason）奪得超人氣金曲獎，他說：「難得有人氣，我不嬲少㗎嘛，啲人只會用實力派嚟形容我，不過我之前紅館開騷走時，見後台等我嘅fans多咗，咁係咪人氣勁咗？」有指他女兒腳頭好，或者fans其實是想看他的女兒，Eason說：「啲人問觀音借庫，我就問千金借氣！」Eason謂他不用做女兒經理人，因他像林海峰一樣，有太太做女兒的經理人。
而霆鋒演出時勁high，有指竇唯現時事業家庭均不順利，霆鋒說：「我唔識佢，唔想亂答，唔關我事。」
Twins則奪得港台地區音樂先鋒組合獎，她們表示稍後會推出第二張國語碟，現尚欠一首歌未選好，鍾欣桐（阿嬌）說：「我想搵首輕快歌，可以配合跳舞。」蔡卓妍（阿Sa）即時說：「唔好打側手翻，我想好似鄭希怡咁出去學跳舞，我想去韓國學。」
衞詩被朋友出賣
有雜誌指衞蘭陪仔吃飯，該男子原來是應昌佑，其妹衞詩則與朋友開房耍樂，連其父也被偷拍，前晚衞蘭表示其父面對狗仔隊處理得好，也沒有不開心，反而其妹的照片像是被朋友出賣，所以心情欠佳。
採訪、攝影：曾小嘉
