大市回軟，似乎未有令新股熱潮降溫太多，內地百貨企業南京金鷹（3308）招股已經截止，聽講反應唔錯,，而跟住又有新股中國建材招股上市。
中國建材主要生產水泥，雖然聽講招股定價唔平，但勝在有個好保母。中國建材用大摩做保薦人，而大摩往績令人有信心，唔少芬佬都準備要貨。
另外，經紀黃早排推介的中國稀土（769），上周五股價突然見異動，急升11.11％，收1.30元，成交亦明顯大增，有成2251萬股，金額高達2850萬元。
中國稀土近排咁熱鬧，主要係炒與美國通用電氣結成策略聯盟消息。公司早前曾打開口牌，話雙方正傾緊入股事宜，但近期仍未有公布，似乎仍差臨門一腳。上周五股價突然異動，唔通已經傾掂數？
但經紀黃就話唔係，中國稀土與通用電氣合作消息令投資者增強信心，近排芬佬陸續買入，由於上周五有大盤殺到，中國稀土股價先至突然急升。
慕容小初