滙豐新一輪投資服務嘅宣傳攻勢再度出擊，大家除咗喺中環地鐵站大堂見到蝴蝶滿天飛，以及喺電視上見到佢哋嘅廣告外，噚日滙豐鄭大班仲親自出馬，喺尖沙嘴海運大廈宣傳「財經視野、強人列陣．滙豐投資服務：投資從此化繁為簡」活動。
滙豐搵咗曾淵滄、石鏡泉、麥萃才、陳永陸、胡孟青、蘇偉文同呂樹發七名投資分析家，將佢哋嘅財經分析意見擺上滙豐網站，供客戶瀏覽。會上曾淵滄向退休人士提供理財貼士，佢話𠵱家啲人60歲退休後，分分鐘仲有成20年要捱，如果好保守咁理財，「到70歲時未病死都已經餓死」，因此，佢建議退休人士將10%積蓄作為現金，作不時之需，90%則投資於股票。好似買滙豐股票收股息，就已經好過將錢存喺滙豐銀行收利息。