小時候的薛凱琪（Fiona）已經很有表演慾，最喜歡在親友面前唱歌；拍照時，她可以提供不同甫士，永不重複。不過，小Fiona也有三不，就是不哭、不叫、不扭計。即使絆倒、撞傷甚至碌落床，也從來不吭一聲，非常硬頸。才在四歲，竟離奇地開始戒肉食齋，由肥肥白白變成皮黃骨瘦，令薛媽媽既心痛又頭痕。
薛凱琪不止頸長，更屬硬頸分子。小時候的Fiona雖是個乖孩子，不哭、不吵、也不扭計玩對抗，基本上她是沒有聲音的，但這樣薛媽媽才怕，擔心寶貝女頭暈身㷫也不會作聲。
午餐派同學
薛媽媽曾經以「幾奇怪」、「又乖又曳」來形容童年時代的Fiona，Fiona憶述年幼趣事，亦不禁哈哈大笑說：「我都唔知細個點解會唔喊，有時跌親、仆崩牙，都係冇聲，打針又唔喊，媽媽話我唔知係樂觀定硬頸，但都算係一個易湊嘅小朋友。」
Fiona續說：「我BB仔嗰陣本來係肥嘅，到四、五歲就開始唔鍾意食嘢，仲突然唔肯食肉，淨係食菜，身體唔係咁好，成日都病；後尾讀小學，媽媽特登整飯盒，等我帶番學校食，但我日日都將啲飯盒分晒畀同學食，自己又唔食喎，媽媽都奇怪我點解會食得咁乾淨。有次有個同學同我媽咪講多謝，話佢煮啲飯好好味，穿煲啦！被媽媽省到立立令呀。」
不滿禁宿營
Fiona從小就服從性甚強，惟獨有次母親禁止她參加小學宿營活動，就令Fiona很不忿，她說：「嗰次全校都參加，得我一個冇去，啲同學仔係咁笑我，我咪唔開心囉！其實媽媽係太錫我，唔放心啫，第二年佢都終於畀我去宿營。」
採訪：朱倬誼 部份圖片提供：薛凱琪