李澤楷籌備經年、想做中文CNBC嘅now財經台，今個月20日正式啟播，係龍係蛇到時就知，但二少啲嘢一向有水準，淨係睇個啟播典禮就知，張型仔英雄帖經已送到各大傳媒老總手上（K寶春哥都應該有份），20號朝早9點喺會展恭候，儀式準時9時45分開始，對班半夜3點都未瞓嘅前輩嚟講，呢個係痛苦但又必須要去嘅畀面派對！
華華可以想像，嗰朝最精神嘅只有兩個人，一個係唔使點瞓依然咁俊嘅二少，另一個就係榮譽嘉賓煲呔，餵完錦鯉去埋教堂再落灣仔Dump番轉，說時遲那時快又話食晏，咁又一個上晝，正！唔知到時二少會唔會為煲呔安排個獨家訪問呢？
咁二少主持大典，第二把交椅阿Jack又負責咩呢？唔使擔心，呢啲大龍鳳梗唔少得佢老人家，今日下晝5點，8號仔幾個至少4字頭嘅男子組，會率先同大家介紹財經台，呢個主持組合由阿Jack做膽，拖熊貓仔AA（即係艾維朗）、梁董德昇同埋財經台話事人羅燦哥哥，陽氣咁盛就梗要搵啲靚女戥番吓，聽聞已安排班女主播收市後喺灣仔趕嚟，所以要5點至開波！
話時話，啲人成日問個台有咩睇，華華打肥佬黎工，鬼知二少畀咩嘢人睇呢？人家話明做CNBC，唔通會有拳頭同枕頭？但可以講畀大家知，如果你先排俾二少揀中免費試玩佢個3G，咁你就可以先睹為快！
李華華
讀者如有任何意見或報料，歡迎發送電郵至[email protected]。