歐洲紅白藍紅酒國又發生學生抗議事件。孫柏文響花旗國大學生活嘅時候，已經好鍾意睇人搞學運，睇吓佢哋嘈乜嘢。求學時期，我母校都好多人搞學運，每一次我都會去睇睇，睇下有冇靚女。
當時孫柏文仲以為這些學生運動家一定對真理好執着，亦都歡迎有人篤爆佢哋深信的謬論，甚至會欣賞好似我一樣有金手指嘅人。當時我同佢哋爭拗，並唔係去玩嘢，其實只是希望多點人欣賞我隻金手指。
不過得到一班麻甩友欣賞我，對我呢個血氣方剛嘅青年來說，真是沒有甚麼增值可言。所以，每一次有學運我都會特別去捉住比較靚女嘅學生運動家，跟住用隻金手指去篤醒佢。諗住佢會好欣賞我嘅真誠。點知過咗四年，要去到大學最後一年的最後一個學期，先至明白點解我讀大學的時候冇拖拍。
自此之後，為了自己生活不會淡而無味，孫柏文見到靚女學生運動家嘅時候，隻金手指都很少出鞘。最慘係無嘢篤嘅時候，我個腦同埋隻金手指都會唔高興，而有嘢篤嘅時候，荷爾蒙分泌就不平衡。後來身體各部位達成共識：唔係唔可以篤，不過要像奧運會一樣，到四年一次嘅立法會選舉先可以去篤爆靚女社會運動家的謬論。
上個禮拜，孫柏文睇屋企嗰部公仔箱，見到啲紅酒國大學生時，便舊病復發。
紅酒國熱血青年高叫國號「自由、平等、博愛」，抗議啱啱通過嘅「首次僱用合約」法例。呢條法例容許紅酒國的老闆比較容易大膽起用年輕工人，不過就冇咗以前嗰種「免炒金牌」。表面上，學生不滿冇咗以前嗰種有人請便冇得炒嘅「保障」。不過這些學生唔明白，如果老闆請錯人但係又唔可以換人，佢哋就連請人都慳番。𠵱家可以畀老闆試到啱為止，所以亦可以盡情請人試試，對學生實在百利而無一害。
不過孫柏文相信，這條法例生效之後，大家都會減少見到紅酒國學生去搞學運。因為到時年輕人勞工市場搞活了，大家都會忙住去寫履歷、準備面試，又點會好似𠵱家失業咁，大把空閒時間去搞搞震、搞學運？
最後奉勸所有家長，如果你的仔女大把空閒時間去搞搞震，與其鬧佢哋無所事事，不如跟我一起去篤爆立法會內，社會主義政客提倡的那些所謂勞工「保障」。
孫柏文
更正︰上周五金手指講及奧馬仕可換股票據若全數行使，可以將股本擴大三十三倍，正確的計算為︰股本x1.0572。原文因排版問題寫成「股本x1.0572」。