湯盈盈昨日首次在婚紗騷示範中式裙褂，她原表示將來結婚一定會選擇婚紗，但昨日行騷後則一改口風，表示兩者都一定穿着，更指裙褂十分方便和舒服。盈盈事後表示將來結婚一定要着繡花鞋及戴金飾。
湯盈盈、唐寧、2R、李詩蓓和朱咪咪等，昨日於大角嘴為「大角嘴廟會」擔任表演嘉賓，其中湯盈盈、唐寧、李詩蓓及朱咪咪行婚紗騷，各人分別以婚紗及裙褂出場，鬼妹仔性格的湯盈盈原本表示將來結婚一定會以婚紗為主，但當她穿上裙褂後即改口說：「都係着裙褂舒服啲，又可以烏低身唔怕走光。」
玩新郎除褲射水
眾星穿上裙褂均配繡花鞋，惟獨湯盈盈穿上高跟鞋，問她為何未有穿繡花鞋？她說：「因為佢哋唔記得帶畀我，咁咪幾好，可以睇落高啲，不過我結婚一定要着繡花鞋。」不過盈盈獲朱咪咪借出鑽石耳環補數。
問男友可有向盈盈求婚？她說：「冇呀！睇吓一陣會唔會有觀眾向我求婚啦。不過我諗將來結婚，一定會俾人玩得好慘，因為啲朋友結婚嗰陣，我哋都玩到個新郎除褲，露出個屁股然後用水槍射佢。」
2R穿高跟鞋舞龍
而2R昨日以活力大使身份亮相，兩人更穿高跟鞋舞龍，現場見Rosanne的上圍明顯較為突出，她說：「係衫嘅問題，平時都係咁㗎啦，冇乜特別。」妹妹Race亦取笑說：「我都知今日輸啦，所以我着成咁囉，咪畀佢贏一次囉！」
採訪、攝影：王崇穎
