田北辰劈炮，震動政府，前日身兼九鐵董事嘅財經事務及庫務局局長馬時亨，就猛叫大家以和為貴，不過，相信今次事件，亦會對分拆證監會主席嘅問題，響起警號。因為政府就係覺得證監前主席沈聯濤管治有問題，至諗到分拆佢個位，理據同當初將楊啟彥個九鐵主席職位分拆如出一轍，點知𠵱家搞出大頭佛。
其實政府要將個位分拆做非執行主席同行政總裁，主要係為咗互相制衡，以免一個人權力獨大，但若果分拆後兩個人之間有矛盾，就可能發生今次事件。
記得舊年沈聯濤離職前，大肆批評分拆證監主席並不適當，𠵱家搵咗收晒聲嘅韋奕禮嚟做分拆後嘅總裁，可能短期內冇事，但如果第二時搵咗個多多聲氣嘅人做證監新主席，唔知會唔會又出現田北辰事件翻版？