最近街機好興卡機玩法，好多新遊戲推出，都要玩家拎住張IC卡傍身，NAMCO最新推出嘅《DragonChronicle：天空大決戰》，亦都係食住條水，不過今次玩法比較特別，玩家可以訓練飛龍，除咗可以同場與其他高手過招鬥龍外，仲可以同其他玩家飛龍「交配」融合，生條龍仔，真係可以睇住條龍大。
記者：許福合 攝影：陳偉強
呢款NAMCO新作喺上星期5晚先落場，不過似乎有線路問題，據知機舖搞咗一晚都未玩到，不過已經急Call師傅嚟幫手，見報之日相信已經可以讓玩家玩個痛快。
6種屬性相剋
《DragonChronicle》提供4人對戰機座，另加一個大屏幕讓圍觀者更清楚戰況。至於入場費，開局連一張IC卡都係$15，之後每局就收$4，尚算合理。當坐定定後，會發現整個機座完全無任何按鍵，事關操作會全靠篤芒進行。開始時除可替龍改名外，仲可選擇6種屬性，結果將亦影響到攻擊同防禦技能；據現場玩家教路，着重攻擊可選擇雷，而金就防守較好，要揀邊種好視乎龍仔嘅「發育」方向，屬性有着決定性影響。
龍仔升級卡上變臉
操作方面係直接篤芒嚟玩，而下方一條橫列彩Bar代表時限同攻擊速度，愈高等級就能提高出招速度。
普通招外重有覺醒技，當被擊中三下左右就有機會發動，攻擊力大之餘，出招畫面亦好華麗！當每場大戰後就會埋單計數，睇吓有無機會升級。最好玩亦係呢度，事關升級後，龍嘅外形會變，更加特別係遊戲卡上嘅龍樣都會變，相當好玩！亦可跟其他玩家嘅龍融合，產生出新龍，雖然未必會勁啲，不過玩法都幾過癮。
玩家意見
Chris：卡面普通
卡面設計普通咗啲，無咩特色，唔夠吸引力要人儲卡。
Patrcik：幾易上手
玩法其實比一般育成遊戲更簡單，比較着重戰鬥部份，加上篤芒就玩得，好易上手。
鏡頭以外
由於機座新鮮熱辣落場，記者去到仲係駁緊機，所以試玩時出現LinkError！好彩最後師傅都駁得掂，不過已嚇得筆者花容失色！
PROFILE
遊戲類型：卡片對戰
對應機種：街機
開發商：NAMCO
售價：$15開局，以後$4一局
鳴謝：金沙遊戲機中心（31682530）
地址：觀塘觀塘道410號地庫01室