近排電腦男狂煲緊PS2隻《新鬼武者》，努力攻破5大魔空空間同100%圖鑑，本來差少少，諗住噚日放假打爆埋佢，點知一開Menu就Hang機，將部PS2打橫、打斜擺都搞唔掂。心諗，算啦，都玩咗三年，係時候換部新嘅，費事一陣打到99層死機，咁就真係「變身」鬼武者嘞！
打落老死間Game舖度問，行貨PS2暫時冇，水貨改機啱唔啱？電腦男一向唔支持人玩翻版，梗係即場SayNo啦，轉頭食完老麥就走落銅鑼灣間SonyShop度買PS2，招呼我嘅哥哥仔好熱情，啱啱諗住磅水走人返歸繼續作戰時，佢竟然話買機要買埋Game！大佬呀，我唔係新玩家嚟，屋企大大話話百幾隻PS2Game，仲要我買？你當我係Game舖要硬食你啲Game呀？係你部PS2唔襟捱咋！
最後死死哋氣返老死間舖度，買咗部「PS2．改」，會唔會改正歸邪玩番梘？睇吓心情啦。
3月12日 心情：惡劣