過去1周，恒指跌356點（2.3%），日股則升452點（2.9%）。1月中，日本活力門出事時，日股指數低過港股317點，𠵱家調轉好多，佢哋高過港股670點，港股有條件追番上些少。
上周五，美股掂檔，港股短期會受到帶動。鎖定落後藍籌，繼而揀數據靚嘅C輪炒。
新地C輪9791：新地（016）前周五晚派成績表，市場唔太鍾意盤數，新地股價上周一與周二共回落2.85元後，已見支持，周三、周四回升，周五冇郁。成績表新聞已經反映完畢，短期將跟住大市好番啲。
搵新地C輪短炒，向9791埋手。隻輪5月初夠鐘，輪價41.5仙，溢價0.9%，槓桿率19倍（有效13.8倍），引伸波幅19.3%。新地本周四除息0.70元，計埋除息因素，隻輪實際溢價都係1.8%，唔貴。除息前，新地如有搶息活動扯高正股，揸輪亦已先有着數。
領匯C輪4509：領匯（823）1個禮拜內由17.40元跌到16.50元，唔見0.90元，好少見。兒童基金唔係渣斗嘢，睇吓幾時發功，買定C輪博反彈。
領匯C輪最熱門係4509，上周大跌31%，最啱博反彈。7月下旬到期，輪價19.9仙，溢價3%，槓桿率8.3倍（有效6.6倍），引伸波幅23.9%。其他同類輪，無論數據與交投，全部比唔上4509。
章盛