一位年輕母親，懷孕時被公司無情解僱，女兒出生後不久，被發現左眼眼肚生有血管痣，同時丈夫在街頭又發生意外，現時腦內積有瘀血；種種不幸，令他們一家生活陷入困境，現時更須寄人籬下。「我只希望可以解決暫時嘅經濟困難，然後好好照顧丈夫，畀心機湊大個女。」阿婷欷歔說。
阿婷今年才二十七歲，她向記者憶述去年懷孕時被前僱主解僱，仍顯得意難平。
「當時我曾經喺電話同舊老細講過我有咗，我都未返到公司交低封醫生證明，佢就好快咁炒咗我，然後就用呢個做藉口，反口話唔知我當時有咗BB。」懷有身孕的她向勞工處投訴，最後她挺着七個月大的肚子上法庭，因為體力實在難支，她最後接受前僱主三萬元賠償。
丈夫受傷腦積瘀血
她稱，丈夫阿峯的工作不穩定，他們須靠賠償金過活，怎料屋漏兼逢連夜雨，阿峯上月初在女兒晴晴出生後不久，在街頭遇到意外，被送往伊利沙伯醫院。
「佢都唔知係自己仆親定係俾人扑頭，總之事發後成頭血，醫生話佢個腦入面積咗唔少瘀血，唔知幾時先會散。」
她表示，丈夫於意外發生前才找到工作，當時他們以為雨過終於天晴，怎料卻突遭意外，亦因此丟了工作。丈夫醒來後，曾出現短暫失憶，現時只能認得家人和部份朋友，日常生活大受影響。
「佢𠵱家行步路都唔係好穩，同佢講嘢佢反應好慢，有時都唔係好識應人，間中就成個大細路咁。」
與此同時，女兒晴晴一個月大時，左眼眼肚突然生了一粒血管痣。因位置與眼睛十分接近，故須定期攜女兒往眼科醫院覆診，觀察進度，避免血管痣影響視力。
照顧家人心力交瘁
「我𠵱家惟有同佢戴手套，怕佢用手唔覺意抓穿粒血管痣，影響到左眼。為咗睇實佢，搞到我精神好緊張，所以我惟有搬返去媽咪嗰邊住，多個人照應。」
她苦笑稱，現時恍如「湊住兩個細路」，又須定時與丈夫返醫院覆診，令她疲於奔命，心力交瘁。
「我從來都冇諗過自己會咁黑，突然間幾樣唔開心嘅事接連咁發生。但係頂唔住都要頂，我有向社署申請綜援金，但係冇咁快批到。」蘋果日報慈善基金了解過阿婷苦況後，即時撥款一萬元助她暫度難關。
捐款編號：C1953
醫生意見：血管痣近眼恐損視力
皮膚科專科醫生陳衍里表示，血管痣是由於真皮或皮下血管組織增生過度形成，一般可以打類固醇、激光及手術三個方法治療。血管痣往往會自行消失，但如位近眼睛，恐日後會影響視力，故父母須小心處理。
他稱，血管痣生長速度可以很快，一年內變得很大粒，若晴晴的血管痣增生影響視力，甚或已經出現「倒雞」，便須盡快做手術。「我個人建議做手術，因為喺眼睛附近位置打類固醇，事後若有藥入咗眼球血管，過去曾經有例子因為咁而盲咗。」
蘋果投訴熱線：29290000
社會服務熱線：29908288
傳真：23702192
電郵：[email protected]
