特區政府預備搬政府總部去添馬艦，本已有定案，好多立法會議員早已表示支持。點知舊年民建聯突襲曾蔭權，話唔贊成，建議政府總部搬過去啟德，於是搞到政府一頭煙。
前幾日，一向慣咗睇清楚風從哪裏來，每次押寶有九成幾中獎機會嘅賭王何竟然出聲，叫民建聯唔好事事反對，要支持曾特首，贊成添馬艦大計。
賭王出聲，我哋做儍瓜都知道「北風今與曾郎便」，民建聯要搵下台階嘞。呢日到香港會食飯，碰到議員C，佢話民主黨會支持添馬艦計劃，令政府有足夠立法會議員嘅票數，得以在立法會通過撥款興建新政府總部喎。議員C素來消息靈通，左丁山冇理由懷疑佢，佢又問：「怕唔怕有人批評民主黨轉軚呢？」
唓，轉乜軚呀，左丁山話明支持添馬艦興建政府總部，由來已久，至今立場不變，如果民主黨全部投票贊成，左丁山第一個鼓掌。民主黨黨員從政已久，應知道現實政治唔係玩學生會選舉，要成熟啲，現實啲。有啲人做過一日學生領袖，成世人最叻嗰次，入到社會做事，重係以學生會方式辦事，十足一個長不大的頑童，於是一世冇成就，民主黨內好多議員已經年近五十歲，甚或過之，應知道做議員唔係逢政府必反嘅，總有啲事要支持吓，識得妥協，因為政治就是妥協的藝術吖嘛。
民建聯話政府應該搬去啟德，實在無厘頭，民主黨無謂陪佢癲。有人話將添馬艦改為花園，係以童子軍心態立論，最好返大學再讀過書。如果要造花園，下亞厘畢道舊政府總部係更好位置，可與香港公園、兵頭花園、皇后像廣場連在一起，唔似添馬艦係一個孤島。如果要賣地，喂，現政府總部一帶位於中環中心地段，更值錢！民主黨支持添馬艦計劃嘅話，證明佢哋識得用腦，抵讚。凡民建聯反對嘅，民主黨何必跟風？毛主席話過，凡敵人反對的，我們便贊成，內有深意。