新歌《當玫瑰遇上真愛》唱盡流金光影，重溫的都是昔日香港好戲。說到食，無獨有偶，Yumiko也力推幕幕演進都是一幅香江浮世繪的車仔麵。
甫到麵檔，都未來得及坐低Yumiko已經同老闆Order碗五餸油麵，「梗係啦，我咁為食！」為食，也得講心水。原來學生時代Yumiko已同男朋友仔四圍食美味車仔麵，情竇初開才真箇滋味！碰巧，這天Yumiko在麵檔遇上了苦榮！
記者︰方綺君
攝影︰陳偉強
服裝︰DKNY
拍拖搵食 迷戀辣膏
「喺慈雲山讀書嘅時候，鍾意同同學一齊周圍去搵嘢食，最懷念有檔大牌檔嘅炸魚蛋波，我哋叫佢炸蛋，哈哈哈。」一講食，Yumiko就滔滔不絕。至於平民的車仔麵，愛佢除因為好食外，「香港以外搵唔到其他地方可以食到，而且學生時期，會拍拖同男朋友周圍去搵車仔麵食，𠵱家出嚟做嘢已經少咗好多！」
雖比往日吃少了，但饞嘴的她還是會一個月來新記兩、三次。老闆娘一見伊人即笑到見牙唔見眼︰「靚女你好耐無嚟啦，好掛住你。」「係呀好忙呀，我都想多啲嚟㗎！」你一句我一句，小記都無位插口！「呢度都係朋友介紹，一試難忘！至愛豬皮、豬紅同雞翼尖，通常會配油麵，女仔怕肥可以食米粉。重有，我一定撐呢度嘅秘製辣膏，但我唔係好食得辣，通常食少辣。」
靠秘製滷水 日賣過百碗
除Yumiko推介的辣膏，秘製滷水亦誇啦啦。店內的食物如牛筋、豬腸、雞中翼等等大多用自家的秘製滷水煮，初開始落的滷水會先煮雞翼、雞翼尖和豬頸肉，滷到連骨頭都有味，跟着是牛筋和豬腸等。營業前兩個鐘，就開始煲煮麵用的豬骨湯，老闆娘鍾小姐話湯底煲足兩個鐘先會開門做生意，咁堅持質素難怪一個午市就可以賣百多碗麵。
Yumiko自選5餸油麵 $30（麵底$5、每餸$5）
油麵有光澤而爽滑，蘸辣膏伴吃香而不鹹。餸料有魚蛋、豬皮、豬紅、豬大腸及魷魚，和味！
地踎豬腸 $5/餸
魚蛋、豬紅都是車仔麵的招牌餸，這裏也有40多款任揀。但小記還是最愛豬大腸，因港式地踎美食已買少見少。美味處依然是那招牌滷汁。
抵喫小食 各$10
小食也不失禮。無骨鳳爪（前）一貫的酸辣，是最好的開胃前菜。滷水雞中翼（後）果然入味，不是一味的鹹，還有分明的香與甜。
食客有Say
新記車仔麵（25735438）
地址︰銅鑼灣登龍街49號B舖
營業時間︰12:00nn-11:30pm
