前晚喺廣州舉行嘅《9+2音樂先鋒榜頒獎典禮》，由布仁巴雅爾、烏日娜同英格瑪主唱嘅蒙語歌《吉祥三寶》先後獲得內地十大音樂先鋒金曲、最佳創作歌曲同十一家主辦電台聯頒嘅最佳專輯獎，加埋之前頒獎禮上所贏取嘅獎項，風頭絕對係一時無兩。
演唱方式似足
之不過，呢首《吉祥三寶》早前已經俾人話抄襲二○○二年上映嘅一部法國電影《蝴蝶》（LePapillon）裏面嘅歌曲，馮仁昭聽過嗰首歌，同《吉祥三寶》呢首歌，無論喺節拍、意境以至演唱手法都十分相似，唱嘅方式亦都係細路同大人一問一答，最唔同嘅地方就只係《吉祥三寶》多咗把女人聲。
《蝴蝶》嘅法國導演PhilippeMuyl對今次抄歌事件好憤怒，大前日已經喺當地法院提出訴訟，估計日內布仁巴雅爾都會收到法國方面嘅書面通知，但隔山打牛，呢單官司打起上嚟都幾麻煩。