最近唔單止新機市場淡靜，原來水貨都一樣咁「窄」！據先達Sales講，呢期熱賣緊嘅機款，依然俾SHARP同SonyEricsson玩晒，除咗日版903SH狀似股票般有升有跌之外，連隻SEW900i都唔執輸，當水貨價冧至四千關口嗰陣，突然又話升番一成，重要得黑色冇得揀，機民真係俾佢激到扎扎跳！
記者、攝影：陳國輝
水行同時缺貨
SE近期力作唔係講緊W800i，就係W900i。不過，先達Sale話W800i貨源充裕啲，而且售價變幅唔大；相反，買W900i就要揀時機先可以「落手」，相當得人驚！據講於上星期，本來水貨價已冧至$4,100，但嚟到周末，因為拆家突然宣布缺貨，令其身價再躍升至$4,500左右，升近一成！同時，行貨命運亦差不多，缺貨關係，行價被逼升番5字頭，最慘係全場冇晒白色，剩低黑色可以揀，對SE迷嚟講，有錢都買唔到心頭好，絕對係悲、悲、悲！