有老友問︰「你明明是一個古典自由主義經濟信徒，為甚麼到蘋果財經去教人炒股炒外滙？」其實理由好簡單。試諗下，如果香港人誤解市場，甚至心存恐懼，怕參與市場，又點可能要佢哋愛戴市場？利世民寫財評專欄只不過想為廣大讀者搵出市場可愛有趣之處，當然如果可以幫到大家從市場上嘗到成功的滋味，為自由市場找到多幾個知音，就真係最完美嘅結果。
其實有心睇財經版嘅朋友，或多或少都有參與市場，相信當中更有不少是由開市到收市都睇實個市，對每一日嘅市場動向瞭如指掌，亦不必再多費唇舌講埋啲「市場充滿風險」呢種多餘的話。當然將市場風險講得清清楚楚，亦可以避免不必要嘅「傷亡」。
不過利世民始終認為，唔需要將小投資者睇成羊牯。上星期證監發表一份調查，引證咗呢個睇法。調查發現，香港只得四成七投資窩輪嘅投資者/投機者蝕錢，呢個數字算係非常之理想，而且超過九成被訪投資者明白窩輪係高風險投資工具。利世民睇到證監發表嘅數字，不期然發出會心一笑︰「睇吓邊度仲有人會話小投資者唔識嘢？」
人對市場的觀感，以不同人對攀山運動的看法來形容最貼切。有些人一聽到高山上種種惡劣環境，就已經提不起勁，不要說叫他試試上大帽山，就連聽別人講登山經驗都沒有興趣。另外一種人就是喜愛高風險活動，愈難登的高山就愈有興趣去挑戰，征服了阿爾卑斯山，就想要到喜瑪拉雅山；戰勝了喜瑪拉雅山，就想到徒手不用氧氣筒上高峯。
唔怕有風險 最怕自以為是
以上兩類人，其實都知道攀山運動有風險，不過前者其實根本不明白真正的風險是甚麼，只知道怕；後者不但了解登山運動的風險，而且會想辦法解決問題。其實風險唔代表啲乜，最緊要有份參與嘅人學識點面對風險。
最怕有啲人自以為是，以為自己保護緊小投資者，其實係嚇怕其他根本無份參與市場嘅人。情況就好似嗰啲好日都唔會行山嘅人，竟然要求立法監管其他人攀山，你話係唔係好心做壞事呢？
利世民