無綫近年力捧林峯、黃宗澤、吳卓羲和馬國明四位新紮小生，林峯是四人中入行最早的一個。○○年被委以重任，在重頭劇《尋秦記》中飾演嬴政一角，可惜後勁不繼，近年已被吳卓羲與黃宗澤趕過頭，然而林峯說：「我起步早，佢哋幅度大，有多啲人成個行業至可以蓬勃，應該開心至係，比較唔一定係壞事，咁先keep到動力，令自己不停進步。」
愛古裝懶理甩頭髮
林峯跑得慢，除了被緋聞拖累外，拍古裝劇太多亦有影響。事實上，大多數小生提起拍古裝都怕怕，一來古裝劇難紅人，二來要穿厚服，三來超長對白又難記，還要黐頭套會引致脫髮，但是，林峯演了一套又一套的古裝，仍然甘之如飴。
吳卓羲曾經強調自己是個時裝人，古裝劇應留給林峯，林峯聽罷只笑道：「叫佢算罷啦！一個演員應該古今都做得好，咁至可以全面發揮，戲路會闊好多。」
林峯與吳卓羲私底下很老友，工作上卻為競爭對手，問林峯如何維繫這一段戰爭中的友誼？他便說：「定期同Ron（吳卓羲）傾心事，同佢都算見得好密、傾到心事嘅圈中朋友。當年我哋曾經講過，唔好諗住大家唔會係競爭對手，（競爭）一定會有，我知人哋會攞呢啲嘢嚟講，大家亦會聽到呢啲說話，但私底下絕對冇事，我哋處事、諗嘢嘅方式幾接近，大家心照，唔會聽其他人講幾句嘢就有影響，我哋會互相迫大家進步，咁係好事。」
今時今日吳卓羲，大鼻傳聞滿天飛，林峯卻為老友撐到底，他說：「佢係好直嘅人，唔覺佢有乜嘢問題，同我當初識佢時冇變過。」
有米少爺闖公仔箱
年齡：26歲
學歷：美國加州大學一年級，主修建築，副修音樂
入行經過：九八年無綫藝員訓練班旁聽生，之後簽約成為演員
背景：父親林華國坐擁六億身家，契媽為利孝和夫人
參與電視劇：《覆雨翻雲》、《YummyYummy》、《天涯俠醫》、《大唐雙龍傳》、
《血薦軒轅》、《律政新人王》、《雲海玉弓緣》、《流金歲月》、《再生緣》及《尋秦記》等
曾奪獎項：○四年憑《大唐雙龍傳》獲無綫台慶我最喜愛的電視角色獎、○三年於無綫台慶奪飛躍進步男藝員獎等
資料來源：《蘋果》資料室