———藝人出位衣着逐個捉
華仔方便索褲
劉德華：「着緊呢套西裝係訂做嘅，最特別係條西褲其實係波褲款，師傅特別喺褲頭位加入一條索繩，我只要將條繩索實就得，非常方便。但我唔會着太窄腳嘅褲，好似今日呢條就啱啱好，西裝褸就乜嘢款式我都可以接受，不論oversize或者slim款式都可以，不過布料最緊要有重量，因為布料太輕畀我感覺唔似件褸，似tee多啲，彈性布料我都唔會揀。」
四哥姣製鏈靴
謝賢（四哥）：「買嘢唔一定要貴，最緊要有型，我買架電單車都二十幾萬，揸電單車梗要配番成套皮衫褲，淨係皮褲我都有十幾條，遇到鍾意嘅我會即刻買。呢對皮靴嘅裝飾吊鏈係我自己加上去，喺屋企攞住個鉗慢慢cut到靚為止，我後生就發姣，𠵱家就發老姣，最緊要姣得起！」
小齊半價Ball鞋
任賢齊：「今日最特別就係對鞋，因為我之前應歐米茄邀請到意大利都靈出席冬季奧運會嘅開幕禮，嗰度天氣好凍，所以我只係準備咗雪靴，點知夜晚有個晚宴，咁我冇理由上面西裝，下面着雪靴㗎，所以嗱嗱臨出去買對皮鞋，咁啱減價，即刻以半價買咗嚟着囉！」
余文樂玩層層叠
余文樂：「平時着衫就睇場合啦，我斯文同casualwear都得。呢一套黑西褲好得意㗎，條褲腳睇落好似分咗兩截咁，其實係同一條褲，只係剪咗出面嗰層，剩番褲嗰層裡，感覺有層次啲。同埋我係因為襯番之前廣告嗰套衫，所以先咁樣襯。」
採訪：駱華齡、馬建華、王連連、卓美娟
攝影：葉君海、陳慧安
