食環處：慢慢吞　食迷你雲吞

食環處：慢慢吞　食迷你雲吞

老實，如果唔係要交稿，都唔使旨意我行山，荒山野嶺易迷路又話有山賊，至怕行到隻積嗰吓慘吖嘛。不過慢吞吞行完城門水塘之後，我又有唔同睇法喎，一來腳程無錯係遠啲，但行嘅差不多都係平路，易應付；二來景真係超靚，撐到天咁高嘅千層樹林加埋無敵主壩View，靚到唔捨得走，行完之後心情靚靚，啪嗰碗回鍋肉墨魚汁拉麵同迷你雲吞都覺得特別好味。

記者：李智聰　攝影：譚盈傑
模特兒：Nick、Fanny（Salvador）

入旅遊中心了解歷史

城門水塘永遠係熱門郊遊點，星期一至七都有人行山，無嘢𠺝，條自然教育徑開發得好，水塘燒烤路標等配套設施又做到足，就梗係多人撐啦，多人捧場唔怕有山賊吖嘛。一落小巴就係城門水塘入口，方便到爆，拐入菠蘿壩之前，記得參觀城門郊野公園遊客中心，中心內有展板、標本、模型介紹附近針山、草山同城門水塘嘅歷史。信我，溫定書再行郊野公園，肯定你會更全情投入。

■馬騮仔雖然可愛，不過絕對唔係善男信女，睇還睇咪撩佢，小心佢哋飛埋嚟搶嘢食。

■千層樹夠晒高大，棵棵都有四、五層樓高，列陣兩旁好有氣勢。

■自然教育徑其實係一條樹木研習徑，沿途樹木都釘住名牌，呢棵雙思樹夠晒高大。

■另一千層樹林，貼近水塘邊，塘面倒影附近山巒，好浪漫。

■水塘內露出水面的小島，襯托埋附近山嘴，構成一幅靚爆山水畫。

■主壩最佳景點，勝在夠高，係欣賞水塘最佳位置。

■教育徑有唔少牛牛出現，證明呢度啲草夠晒綠油油。

■以前郊野公園內的鉛礦坳有礦藏，中心藏有昔日開礦的實物展品。

■呢個模型好過癮，一餵蕉會發出嘟嘟聲，提醒你咪亂餵蕉畀馬騮。

千層樹林列陣道旁

沿住自然教育徑行，沿途有大樹好遮陰，除咗塘景超靚外，千層樹林亦不得不睇。千層樹特色在隨樹齡增長而不斷剝落嘅樹皮，樹幹望落好似舊牆紙咁，樹皮一層又一層咁外翻跌落地，講真零零丁丁得一棵半棵戙喺度就超醜，但聚木成林就超有氣勢！第一個樹林出現喺郊遊點第5號場側邊，兩邊千層樹至少有十幾個人咁高，帶埋拖友樹下散步勁有電影浪漫Feel；另一樹景出現喺5號場同6號場之間，有小路行出水塘邊，水漲時水會浸過千層樹根部，不過我運氣唔好，撞啱水退影相，望落硬係爭啲爭啲咁。

■主壩附近有幾個燒烤區，不妨嚟個行山燒烤一日遊。

Cutie馬騮仔通處飛

沿路去沿路返，出番菠蘿壩反方向行2個半小時左右，就會抵達城門水塘主壩，沿途綠草如茵，新鮮空氣可以大口大口吸，最過癮係可以睇吓野生動物，乜野生動物咁巴閉？咪就係跳嚟跳去最鍾意同你眼睥睥嘅馬騮仔囉！佢哋經常聯群結隊出現，全部患上過度活躍症，一時踎喺地𢱑痕，一時又飛上樹幹，加埋抵死趣怪嘅表情真係超Cutie。除咗馬騮，教育徑兩旁亦不時有牛牛出現，我發現有牛嘅地方草最靚，樹最高，不過空氣最臭，因為地下有勁多地雷！邊避地雷邊繼續行，唔覺唔覺主壩就出現眼前，塘面波平如鏡，主壩雄偉壯觀，個View咁靚梗要影多幾張相先肯走喇。

■沿路有路標，讀過書識字一定唔會迷路。

落荃灣食街搵食

行完水塘搭小巴返荃灣食街兆和街，N咁多食肆當中，數價錢經濟味道一流首選「蘭州拉麵皇」，師傅係外省人，最勁整刀削麵，自細「練刀」刀法如神，佢話：「我哋主要提供川滬小吃，出名大件夾抵食，整一碗刀削麵，我起碼要削40刀㗎。」單呢份誠意抵撐有餘，何況自製拉麵又確實勁有特色，回鍋肉配墨魚汁拉麵已經夠過癮，每碗30粒嘅迷你雲吞亦勁飽肚，慢吞吞行完成日山，再慢吞吞歎呢碗雲吞，簡直好味到爆呀。

四川擔擔牙刀削麵　$27
■招牌菜，每碗麵要削足40刀，醬汁用榨菜、豬肉碎、花生醬、芝麻同豆瓣醬混製而成，味道甜酸香辣夾雜，直接刺激味覺。

回鍋肉墨魚汁拉麵　$31
■用墨魚汁做膽製成麵粉，再用人手搓成拉麵，香辣回鍋肉配爽口拉麵，入口彈牙爽滑，加青椒、紅椒同豆腐作配料份量十足。

迷你雲吞　$25
■浙江小食，雲吞約有半隻手指公大，包住半肥瘦豬肉，一口一啖啱啱好，每碗30隻非常抵食，湯底加蛋花及葱碎更香口。

■師傅刀工細膩，十幾年功力信得過。

■日日都咁旺場，全靠識得大膽創新。

蘭州拉麵皇（26121528）
地址：荃灣兆和街34號地下
營業時間：11:00am-11:30pm
座位：45個

鍋煎宮廷餃子　$25
■餃子好多地方都食得到，用鍋仔煎就好少見，用雞蛋鋪底再煎可以吸油，確保入口不膩，老闆話上枱永遠保持70℃，保證熱辣辣。

東坡肉灌湯拉麵　$30
■東坡肉大大份，藥材、豬骨與雞湯底任擇，入口湯香濃郁，東坡肉肥瘦適中，而且Size夠晒重量級，一碗兩個人食都夠飽。

雜菜肉絲炒年糕　$28
■用黃蘿蔔、甘笋、肉絲炒年糕，入口鬆化香滑。師傅話年糕都好講切功，全部細細塊易入口，果然照顧周到喎。